kunst ist
isch fia mi es Vielfältigschte was es ibahaupt gibt. Vu Moln zan Kochen bis zur Bewegungskunst.
telfs ist
fia mi bsunderscht, weils echt a schians Platzl isch. Wenn i di Munde bei Sunnen-Auf- und -Untergang unschau – oft sehr long – und wenn se mol wida volle laichtet, woass i, dass do mei Platzl isch. Außadem fahlt ins sinsch nix in Telfs. 5-Sterne Heimatort!
I bin di Sarah Berndlbauer, Baujoah 1999.
Wia viele ondere a, bin i in Telfs augwachsn und a in di Schual gang. Wenn i amol it in da Schual woah, han i mei Zeit entwender dahoam bam moln oda draußn in da Natur alloan oda mit da Family vabrocht. Mia san friaga imma schu viel wandern gang (eha mehr mitzarrt wordn). Mittlerweil isch es Wandern und Bergsteign, dank in Opa Hans und in Onkl Stefan, oans vu di liabschtn Sachn wos i moch.
Do i a imma schu gern gmoln han, hat sich di HTL Bau und Design Zweig Malerei fia mi guad anbotn noch die Pflichtschualjoah. De fünf Joah woan zwar zach (danke fia di tolle Ünterstützung dahoam, sinsch warat des int Hosn gang), oba habm sich glohnt. Sinsch kannt i haint it als Selbstständige Malerin orbeitn. A do mecht i ganz bsunderscht in Papa und da Mama Danke sagn, dass se ma da beigstandn sein.
Seit 2021 bin i hetzan schu alloan unterwegs und verschöner Innenräume und Fassaden. Wenns amol ganz guad lafft, darf i Wandmalereien, Spachtltechnikn, Glasgravuren usw. mochn. Weil ehrlich gsagt, des „Weiß-schmiern“ erfüllt mi hetz it so ganz.
Do mia in da HTL verschiedenste Technikn durchgmacht hobm und mia de a gfalln, bin i recht abwechslungsreich unterwegs. Zum Beispiel es kombiniern vu Spachtltechnikn mit Vergoldn, oda a Folienverklebungen mit Airbrush find i volle kuhl. A mit da Motivauswahl bin i recht vielfältig. Realistische Bleistift oda Kuglschreiber-Portraits san fia mi gleich interessant, als wia amol a ganz a freie Spachtltechnik mit ana gmolenen Bluame obm. I brauch oanfach die Abwechslung und imma nuie Herausforderungen.
I hoff, mei tägliches Schaffn entwicklt sich voll und ganz in die künstlerische Richtung. Des warat mei Traum.
Weil wias so guad hoaßt „lebe deinen Traum“.
